Britaniýaly “Formula-1” sürüjisi Lýuis Hemilton “Mersedes” topary bilen täze şertnama baglaşdy. Bu barada metaratings.ru habar berdi.
Habar berilmegine görä, taraplar iki möwsüme niýetlenilen şertnama barada ylalaşyga geldiler. Oňa laýyklykda, Hemilton, çempionatda ýeňiş gazansa beriljek bonusy hem göz öňünde tutmak bilen, 70 million ýewro alar. Şeýle hem, Lýuis şertnama gol çekendigi üçin bonus hökmünde 2,5 million ýewro we "AMG Project One" giperkaryna eýe bolar.
Geçen möwsümde 35 ýaşly Hemilton ýedinji gezek "Formula-1"-iň çempiony boldy we Maýkl Şumaheriň rekordyny gaýtalady. Şeýle hem, Hemilton Şumaheriň köp ýyllap saklan Gran-Pridäki ýeňişleriň sany boýunça rekordyny gaýtalamagy başardy. Ol oktýabr aýynyň ahyrynda Portugaliýada geçen "F-1"-de 92-nji ýaryşynda ýeňiji boldy. Häzir Hemiltonyň hasabynda 95 ýeňiş bar.
Ýaňy ýakynda bolsa Lýuis Hemilton Beýik Britaniýanyň şa zenany tarapyndan rysarlyk derejesi bilen sylaglanyp, Jek Brebhemden, Stirling Mossdan we Jeki Stýuartdan soň rysarlyk berlen dördünji "Formula-1" sürüjisi boldy. “Mersedes” bilen şertnamasyny täzeländen soň bolsa ol "F1"-de çykyş edýärkä rysarlyk adyny alan ilkinji adam boldy.