26-njy sentýabrda Prezident Serdar Berdimuhamedow “Buig” kompaniýasynyň baş direktorynyň orunbasary Edward Buigi, bu kompaniýanyň Dolandyryjylar geňeşiniň agzasy William Buigi we “Buig Batiman International” kompaniýasynyň ýolbaşçysy Pýer- Erik Sen-Andreni kabul etdi diýip, “Watan” habarlar gepleşiginde habar berildi.
Duşuşygyň barşynda Serdar Berdimuhamedow “Buig” kompaniýasynyň Türkmenistanda soňky 30 ýylyň dowamynda alyp baran giň gerimli işlerine ýokary baha berip, geçen döwrüň içinde köp işleriň ýerine ýetirilendigini kanagatlanma bilen belledi.
“Buig” kompaniýasy öz üstüne alan borçnamalaryny üstünlikli ýerine ýetirýär, bilelikde amala aşyrylan taslamalar bolsa, ýurdumyzyň ykdysadyýetiniň ösmegine hem-de onuň gurluşyk we senagat kuwwatynyň artmagyna saldamly goşant goşmak bilen şäher bezeginiň nusgalarynyň örän baýdygyny görkezýär.
Türkmenistan hyzmatdaşlyk üçin hemişe açykdyr we uly önümçilik kuwwatyna eýe bolan kompaniýalar bilen hyzmatdaşlyk gatnaşyklaryny pugtalandyrmaga taýýardyr. “Buig” kompaniýasy hem olaryň hatarynda mynasyp orny eýeleýär diýip, döwlet Baştutany nygtady.
Işewürler bildirilen ýokary ynam we hemmetaraplaýyn goldaw üçin hoşallyk bildirip, “Buig” kompaniýasynyň geljegi uly türkmen bazarynda eýeleýän orny has-da pugtalandyrmaga uly gyzyklanma bildirýändigini beýan etdi. Bellenilişi ýaly, “Buig” kompaniýasy mundan beýläk-de öz üstüne alan şertnamalaýyn borçnamalaryna berk eýermek bilen, özüne ynanylan taslamalary üstünlikli durmuşa geçirmek üçin ähli tagallalary eder.
Serdar Berdimuhamedow hyzmatdaşlygy mundan beýläk-de ösdürmek üçin oňat mümkinçilikleriň bardygyny aýdyp, türkmen tarapynyň däp bolan hyzmatdaşlygy pugtalandyrmaga hem-de kompaniýanyň anyk tekliplerine garamaga taýýardygyny nygtady.
