Şu gün, 29-njy noýabrda Magtymguly adyndaky Türkmen döwlet uniwersitetiniň guramagynda geçirilen ýokary okuw mekdepleriniň talyplarynyň arasynda himiýa dersi boýunça III halkara olimpiadasynyň jemleri jemlenildi. Ýeňijilere sylaglar gowşuryldy. Bu barada uniwersitetiň resmi saýtynda habar berilýär.
Olimpiada bilen ugurdaş, bu ýokary okuw mekdebinde “Himiýany okatmagyň usulyýetiniň döwrebap kämilleşdirilmegi we himiki tehnologiýalaryň häzirki zaman ösüşi” atly halkara ylmy-amaly maslahatynyň hem ýapylyş dabarasy geçirildi.
Halkara olimpiada şahsy we toparlaýyn bäsleşik görnüşinde, şol sanda şahsy bäsleşik A we B derejede geçirildi. A derejä himiýa hünärinde okaýan we beýleki isleg bildirýän ýokary okuw mekdepleriniň, B derejä himiýa hünäri bolmadyk ýokary okuw mekdepleriniň talyplary gatnaşdylar.
Olimpiadanyň netijeleri boýunça şahsy birinjilikde A derejede baýrakly orunlaryň 65-si kesgitlenilip, olardan 13-si – birinji, 20-si – ikinji, 32-si bolsa üçünji orunlary eýelän talyplardyr.
Şahsy birinjilikde B derejede baýrakly orunlaryň 45-si kesgitlenilip, olardan 9-sy – birinji, 13-si – ikinji, 23-si bolsa üçünji orunlary eýelän talyplardyr.
Himiýa dersi boýunça III halkara olimpiadanyň netijeleri boýunça ýeňijilere altyn, kümüş we bürünç medallar hem-de I, II we III derejeli Diplomlar gowşuryldy.
Dabaranyň barşynda halkara ylmy-amaly maslahatda has tapawutlanyp çykyş eden daşary ýurtly gatnaşyjylara Magtymguly adyndaky Türkmen döwlet uniwersitetiniň şahadatnamalary gowşuryldy.
Ýeňiş gazanan talyplaryň sanawyny şu salgydan görüp bilersiňiz.
